“ವಾರಕ್ಕೊಂದು ಸುಭಾಷಿತ”

ಮಿತ್ರರೇ,

ಸಂಸ್ಕೃತದಲ್ಲಿ ಸುಭಾಷಿತ ಎಂದು ಕರೆಯಲ್ಪಡುವ ಒಂದು ರೀತಿಯ ವಿಶಿಷ್ಟ ಕಾವ್ಯ ರಚನೆ ಇದೆ. ಇವು ಸಾಮಾನ್ಯವಾಗಿ ಎರಡು/ನಾಲ್ಕು-ಸಾಲುಗಳ ರಚನೆಗಳು.  ನಿಖರವಾದ, ತೀಕ್ಷ್ಣವಾದ ಮತ್ತು ನೇರವಾದ ಭಾಷೆಯಲ್ಲಿ ಸಂದೇಶವನ್ನು ತಿಳಿಸಲು ಅಥವಾ ಸಲಹೆ ನೀಡಲು ಸುಭಾಷಿತಗಳನ್ನು ಬಳಸಲಾಗುತ್ತದೆ. ಸು- ಎಂದರೆ ‘ಚೆನ್ನಾಗಿ’ ಮತ್ತು -ಭಾಷಿತ ಎಂದರೆ ‘ಮಾತನಾಡಿದ’. ಇದು ಸೊಗಸಾದ ಶೈಲಿಯ ಮತ್ತು ಸುಲಭವಾಗಿ ನೆನಪಿಟ್ಟುಕೊಳ್ಳುವ ಅಭಿವ್ಯಕ್ತಿಯಾಗಿದೆ.

ಇವು ಸಂಸ್ಕ್ರತ ಸಾಹಿತ್ಯದಲ್ಲಿ ತನ್ನದೇ ಆದ ವಿಶಿಷ್ಟ ಮೌಲ್ಯಗಳನ್ನು ಹೊಂದಿವೆ. ನಮ್ಮ ಸಂಸ್ಕೃತಿಯ ನೈತಿಕ ಮೌಲ್ಯಗಳು, ಸದಾಚಾರ, ಮತ್ತು ಲೌಕಿಕ ಜ್ಞಾನಗಳ ಮಾರ್ಗದರ್ಶನ
ಮಾಡುವಲ್ಲಿ ಹೆಸರುವಾಸಿಯಾಗಿವೆ. ಪ್ರತಿಯೊಬ್ಬರಿಗೂ ಸುಲಭವಾಗಿ ಸಂಬಂಧಿಸಬಹುದಾದ ದೈನಂದಿನ ಅನುಭವಗಳ ವಿಷಯಗಳು ಸೇರಿದಂತೆ ವಿವಿಧ ವಿಷಯಗಳ ಮೇಲೆ ಸುಭಾಷಿತಗಳು ಬೆಳಕನ್ನು ಚೆಲ್ಲುತ್ತವೆ. ಸಂಸ್ಕೃತ ಸಾಹಿತ್ಯದಲ್ಲಿ ಸಾವಿರಾರು ಸುಭಾಷಿತಗಳಿವೆ.

ಅವುಗಳಲ್ಲಿ ಹೆಚ್ಚಿನವುಗಳ ಲೇಖಕರು ತಿಳಿದಿಲ್ಲವಾದರೂ, ಭರ್ತೃಹರಿ, ಚಾಣಕ್ಯ, ಕಾಳಿದಾಸ ಮತ್ತು ಭವಭೂತಿಯಂತಹ ಅತ್ಯಂತ ಪ್ರತಿಷ್ಠಿತ ಲೇಖಕರೂ ಕೂಡ ಕೊಡುಗೆ ನೀಡಿದ್ದಾರೆ. ಇದರ ಜೊತೆಗೆ, ಪ್ರಸಿದ್ಧ ಬರಹಗಾರರ ಬುದ್ಧಿವಂತ ಮಾತುಗಳನ್ನು ಒಳಗೊಂಡಿರುವ ಸುಭಾಷಿತಗಳ ಹಲವಾರು ಸಂಗ್ರಹಗಳಿವೆ. ಸುಭಾಷಿತಗಳ ಶ್ರೀಮಂತ ನಿಧಿಯಿಂದ ಕೆಲವು ಅಮೂಲ್ಯವಾದವುಗಳನ್ನು ಆಯ್ಕೆ ಮಾಡಿ “ವಾರಕ್ಕೊಂದು ಸುಭಾಷಿತ” ಶೀರ್ಷಿಕೆಯಡಿಯಲ್ಲಿ ಪರಿಚಯಿಸುವ ಪ್ರಯತ್ನ ನಮ್ಮದು.  

ಇವು ಯಾವದೂ ನಮ್ಮ ರಚನೆಯಲ್ಲ. ಜಾಲತಾಣಗಳಲ್ಲಿ ವಿವಿಧ ರೀತಿಯಲ್ಲಿ ಉಪಲಬ್ಧವಿರುವ ನುಡಿರತ್ನಗಳಲ್ಲಿ ಕೆಲವನ್ನು ಒಂದಡೆ ಸೇರಿಸಿ ಪ್ರಸ್ತುತ ಪಡಿಸುತ್ತಿದ್ದೇವೆ. ಪ್ರತಿಯೊಂದನ್ನೂ ಕನಿಷ್ಠ ನಾಲ್ಕೈದು ಬಾರಿಯಾದರೂ ಓದಿ, ಮಕ್ಕಳಿಗೆ ಓದಿಹೇಳಿ. ಈ ಪ್ರಯತ್ನವನ್ನು ಕೆಲವರಾದರೂ ಸದುಪಯೋಗಪಡಿಸಿಕೊಂಡಲ್ಲಿ ಧನ್ಯತಾಭಾವವಷ್ಟೇ ನಮ್ಮದು. ನಮಸ್ಕಾರ.